EL CRISTU BENDITU

¿Ondí jueron los tiempos aquellos
que pué que no güelvan,
cuando yo jui presona leía
que jizu comedias
y aleluyas también y cantaris
pa cantalos en una vigüela?
¿Ondi jueran aquellas cosinas
que llamaba ilusionis y eran
a'specie de airinos
que atontá me tenían la mollera?
¿Ondi se jueron aquellos sentires
y las delicaezas
que me jizun llorar como un neni,
de gustu y de pena?
¿Ondi jueron aquellos pensaris
que jacían dolel la cabeza
de puro lo jondus
y enreáos que eran?
Ajuyó tuito aquello pa siempri,
y ya no me quea
más remedio que dilme jaciendo
a esta vía nueva.
Ya no güelvin los tiempos de altoncis
ya no tengo ilusionis de aquellas
ni jago aleluyas,
ni jago comedias,
ni jago cantaris
pa cantalos en una vigüela...!

II

Pensando estas cosas,
que me daban ajogos de pena,
una ves andaba por los olivaris
que la ermita de Cristu roëan.
Triste y aginao
de la ermita me juí pa la vera;
solitaria y abierta la vide
y entrémi por ella.
Con el alma llenita de jielis,
con el pecho jechito una breva
y la cara jaciendo pucheros
lo mesmito que un niño de teta,
juime ampié del Cristu,
me jinque en la tierra,
y jaciendo la crus, recé un Creo
pa que Dios quisiera
jacelme la vía
una miaja tan solo más güena.
¡Qué güeno es el Cristu
de la ermita aquella!
Yo le ije, dispués de rezalí:
- ¡Santu Cristu, que yo tengo pena,
que yo vivo tristi
sin sabel de qué tengo tristeza
y me ajogo con estos ansionis
y este jormiguilbo que me jormiguea!
¡Santu Cristu querio del alma!
Tú pasastis las jielis más negras
que ha podido pasal un nacío
pa que tos los malos güenus se golvieran;
pero yo sigo siendo maletu
y a Ti te lo digo lleno de velgüenza
pa que me perdonis
y me jagas entral en verea.
Tú, que estás en la Crus clavaito
pol sel yo maleto, quitame esta pena
que aentru del pecho
me escarabajea!...
¡Jalo asina, gue yo te prometo
acelmí bien güeno pa que Tú me quieras!

III

¡Qué güeno es el Cristu
de la ermita aquella!
Pa jacel más alegri mi vía,
ni dineros me dió ni jacienda,
polque ice la genti que sabi
que la dicha no está en la riqueza.
Ni me jizu marqués, ni menistro,
ni alcaldi siquiera,
pa podel dil a misa el primero
con la ensinia los días de fiesta
y sentalmi a la vera del cura
jacienda fachenda.
¡Pa esas cosas que son de fanfarria
no da nada el Cristu de la ermita aquella!
Pero aquel que jaciendo pucheros
se jinquí en la tierra,
y, dispues dé rezali, le iga
las jielis que tenga,
que se vaiga tranquilo pa casa,
que ha de dali el cristu lo que le convenga.
A mi me dió un hijo
que paeci de rosa y de cera,
como los angelinos que adornan
el retablo mayol de la iglesia.
Un Jabichuelinu
con la cara como una azucena,
una miaja teñía de rosa
pa que entávia más guapo paeza.
A mí me entonteci
cuando alguna risina me jecha
con aquella boquina sin dientis,
rëondina y fresca,
que paecí el cuenquin de una rosa
que se jabrí sola pa si se la besa.
Juy, que boca tan guapa y tan rica!
¡Paecí dé una tenca!
A vecis su madri
en cuerinos del tó me lo quea,
poní un pañali tendio en las sayas
y alli me lo jecha.
¡Paeci un angelíno
de los de la inglesia!
Yo quería que asín, en cueretis,
siempre lo tuviera,
y cuando su madrí vüelví a jatealo,
le igo con pena;
éjalo que bregui,
éjalo que puéa
raneal con las piernas al airi
pa que críe juerza.
¡Ejalo que se esponji un ratino,
que tiempo le quea
pa enliarsi con esos pañalis
que me lo revientan!
¡Ejamelo un rato
pa que yo lo tenga
y le jaga cosinas bonitas
pa que se me ría mientris que pernea!
¡Que gocí, que gocí
tó lo que asín quiera,
que pa jielis, ajogos y aginos
mucho tiempo quea!
¡Ejamelo prontu pa zarandealo!
Ejame el mi mozu pa que yo le meza,
pa que yo le canti,
pa que yo lo duerma
al son de las guapas
tonás de mi tierra,
continas y dulcis,
que páecin zumbíos de abeja,
ruíos de regato,
airí de alaméa,
sonsonetí del trillo en las miesis,
rezumbal de mosconis que vuelan
u cantal dormilón de chicharra
que entontecí de gusto en la siesta...
¡Miále cómo bullí,
miále cómo brega,
miále cómo sabi
ondí está la teta
si conoci que tiení jambrina
dalí una gotera
pa que prontu se jaga tallúo
y amarri los chotos a puro de juerza.
¡Miáli que prontino
jizu ya la presa!
¡Miále como traga, mía que cachetinos
mientris mama en el pecho te pega!
¡Miá que arrempujonis da con la carina
pa que salga la lechi con priesa!
¡Asi jacin también los chotinos
pa que baji el galro seguío y con juerza!
Ya se va jartando. ¡Miá como se ríe,
miále cómo enréa!
Jasta el garguerinu
la lechi le llega,
porque va poniendo cara de jartura
y el piquino del pecho ya eja.
Quítalo en seguía pa que no se empachi
y trai que lo tenga...
¡Clavelino querío del güerto!
ven que yo te quiera,
ven que yo te canti,
ven que yo te duerma,
al ton de las guapas
tonás de mi tierra,
pa que puéas cantalas de mozo
cuando sepas tocal la vigüela.
¡Venga el mi mocino,
venga la mi prenda!
Ven que yo te besí
con delicáeza,
ondí menos te piquin las barbas
pa que no te ajuyas cuando yo te quiera,
ni te llorin los ojos, ni arruguis
ésa cara más fina que séa,
ni te trinquis p'atras enojao
si tu padri en la boca te besa...

IV

Mujer, ¡mié que lindu
cuando ya esté dormio se quea!
¿Tú no sabis porque se sonríe?
Es porque se sueña
que anda con retozus con los angelínos
en la gloria mesma...

V

¡Qué guapo es mi neni!
¡Ya no tengo pena!
¡Qué güeno es el Cristu
de la ermita aquella!

Gabriel y Galán.